«خطة مدروسة» للانقضاض على ثورة 25 يناير فى مصر

الثورة المضادة أو الخيانة

«البسطويسي» يحذر من «خطة مدروسة» للانقضاض على الثورة

أكد المستشار هشام البسطويسي، نائب رئيس محكمة النقض، أن هناك محاولة لضرب ثورة 25 يناير، وإجهاض مكتسباتها، مشيراً إلى وجود «خطة مدروسة» تستهدف الوقيعة بين الجيش والشعب، مطالباً بقطع الإتصالات عن مبارك وعائلته، والتحفظ علي جميع مقار الحزب الوطني.
واستدل «البسطويسي» على كلامه، بالأحداث «المؤسفة» التي شهدها ميدان التحرير، مساء الجمعة، من تفريق للمتظاهرين بالقوة من قبل أفراد الشرطة العسكرية، والقبض علي عدد منهم، مشيراً إلى اعتذار المجلس العسكري عن هذه الأحداث، وإعلان المجلس تخوفه من محاولة بعض «العناصر المدسوسة» إفساد الثورة وإثنائها عن أهدافها وإحداث الوقيعة بينها وبين القوات المسلحة.
وقال «البسطويسي»، في تصريحات خاصة لـ«المصري اليوم»، إن ما شهده ميدان التحرير، وما حدث في مدينة المنصورة «خطة مدروسة» تستهدف الوقيعة بين الجيش والشعب، أوالانقضاض علي الثورة.
وأضاف «البسطويسي» أننا أمام احتمالين، فإما أن يكون المجلس العسكري على علم بهذه «الخطة» وموافق عليها، وإما أن تنفيذها جرى دون علمه، مرجحاً الإحتمال الثاني، خاصة بعد صدور عدة بيانات إدانة واعتذار عن الأحداث المؤسفة.
وطالب نائب رئيس محكمة النقض، المجلس العسكري، باتخاذ عدة إجراءات حاسمة لحماية الثورة، في حالة عدم موافقته على خطة إفسادها، وهي: «فرض الإقامة الجبرية علي مبارك وعائلته وقطع جميع وسائل الإتصال عنهم. والتأكد من عدم وجود غرفة عمليات لوضع هذا المخطط وإصدار أوامر تنفيذها. وإقالة حكومة شفيق وحكومته، بعد أن تبين من اختياراته لبعض الوزراء، أنهم موالين للنظام السابق. والتحفظ علي جميع مقار الحزب الوطني، وبعض قياداته، التي شكلت الميليشيات المسلحة من البلطجية، والتي كانت تستخدم في إفساد الانتخابات والتظاهرات، وتم استخدامها في الاعتداء علي المتظاهرين في المنصورة. وإلغاء جميع صلاحيات جهاز أمن الدولة وإعادة هيكلته مرة أخري. وحل جميع المجالس المحلية، وتغيير المحافظين الموالين للنظام السابق. وإلغاء الدستور القائم، وإصدار دستور مؤقت للتأكد تماماً من سقوط النظام السابق بكل رموزه ومؤسساته».

قائد المنطقة العسكرية المركزية في «التحرير»
يقول : أعطونا فرصة ... وشفيق سيرحل

زار اللواء حسن الرويني قائد المنطقة المركزية بالقوات المسلحة، ميدان التحرير، على رأس وفد ضم اللواء عبد الحليم عبد الحافظ ومعهم 5 من ضباط الجيش. ووصل الوفد إلى الميدان في السابعة من مساء الاثنين، وطالب الرويني المعتصمين في ميدان التحرير، الرحيل و«إعطاء القوات المسلحة فرص»، لتحقيق المطالب التي تنادي بها الثورة.
وقال الروينى، حسب ما أكد شهود عيان لـ«المصري اليوم»:«أعطوا القوات المسلحة فرصة لتحقيق مطالبكم التي تنادون بها» وأضاف:«نحن نعمل كقوات مسلحة من أجلكم والدليل دعوتنا لتعديلات دستورية تفتح الباب للديمقراطية والنزاهة وتضمن حرية الناخبين في اختيار الرئيس».
وأوضح المعتصمون أن قائد المنطقة المركزية قال لهم:«عليكم أن تجهزوا أنفسكم للانتخابات الرئاسية والبرلمانية القادمة» وأضافوا:«بعض المعتصمين رفضوا حديث رئيس المنطقة المركزية، وقاطعوه بالهتاف ضد أحمد شفيق رئيس الوزراء».
وتابعوا:«رد عليهم الرويني، مؤكدا أن شفيق سيرحل، فقط أصبروا، لكن المتظاهرين رفضوا تطمينات اللواء، الذي غادر الميدان، مع وفد القوات المسلحة، ورفض المتظاهرون ترك الميدان
وهتفوا
(مش هانمشي ... هوا يمشي )»

وأكدوا أن اعتصامهم مستمر حتى تتحقق مطالبهم كاملة وأولها إقالة حكومة شفيق.

«المجلس العسكري»
يعتذر عن فض اعتصام التحرير بالقوة ويحذر من
«المندسين»

قدم المجلس الأعلى للقوات المسلحة «اعتذارا» لشباب ثورة 25 يناير، وذلك في الرسالة رقم 22 على صفحته الرسمية بموقع «فيس بوك». وقال المجلس في رسالته التي جاءت تحت «اعتذار ورصيدنا لديكم يسمح» إن ما شهدته «جمعة الوفاء من احتكاكات غير مقصودة بين أفراد من الشرطة العسكرية وأبناء الثورة» لم يكن بناء على توجهات بعينها، وأكد المجلس أنه حريص على « تحقيق الأهداف النبيلة للثورة»، وأضاف أنه «لم ولن تصدر أوامر بالتعدي على أبناء هذا الشعب العظيم، وستتم اتخاذ كل الإجراءات التي من شأنها أن تراعي عدم تكرار هذا مستقبلا»، دون أن توضح الرسالة ماهية تلك الإجراءات.

وفي بيانه رقم 23 أعلن المجلس قراره بالإفراج الفوري عن كل المعتقلين على خلفية اعتصام التحرير الذي فضته قوات الشرطة العسكرية بالقوة مساء الجمعة. وأصدر المجلس بيانه الرابع والعشرين مؤكدا على وقوف القوات المسلحة في صف الشعب وإيمانها بمطالب الثورة، وحذر من «عناصر مندسة تحاول إحداث الوقيعة» بين القوات المسلحة والثورة، بالاعتداء على جنود الجيش، وأضاف:«نحن على يقين من أن هذا ليس سلوك شباب الثورة». وأكدت القوات المسلحة أن دورها هو «حماية الوطن وتوفير الأمن والأمان» بما يتيح لشباب الثورة «التعبير عن مطالبهم».

ودعا المجلس شباب الثورة «للعمل سويا على إفشال مخطط المندسين على الثورة» مؤكدا أن القوات المسلحة ستظل «الحامية والضامنة لمطالب هذه الثورة العظيمة».

وفي سياق آخر وردا على استخدام القوة من قبل الشرطة العسكرية، لفض اعتصام المواطنين المطالبين برحيل حكومة شفيق في ميدان التحرير، دعا مئات النشطاء على «فيس بوك» لمظاهرة احتجاجا على «استخدام القوة» ضد المتظاهرين، وحدد النشطاء موعد المظاهرة اليوم في ميدان التحرير أيضا. وقال النشطاء في الدعوة «نحن لا نستطيع القبول بهذا، يجب علينا أن نأخذ موقفا قويا ضد العنف ضد المتظاهرين السلميين» ونشر النشطاء مقاطع فيديو قالوا إنها توضح استخدام الشرطة العسكرية لـ«الكرابيج والعصي المكهربة» لفض اعتصام المواطنين.

(الثوره تحتضر)

كلام مهم جدا وخطير جدا بخصوص الثورة
عشان نفهم (الثوره تحتضر) .... اقرأه وانشره من فضلك
تعالوا نحلل بالعقل ولنترك العصبية
بكل هدوء نفهم ونستنتج السياق الزمنى للأحداث
وبلهجة أسهل ... نقول :

* بسم الله الرحمن الرحيم *
أخوتي الكرام شعب مصر العظيم
أتمنى تقروا الكلام ده للآخر وفكروا فيه كويس أوى أوى لإن والله الموضوع فعلا خطير جدا جدا
ناس كتير بدأت تقول كفايه مظاهرات وكفايه اعتصام الثوره نجحت والدنيا زى الفل والتحرير موجود وكلام كتير من هذا القبيل مع احترامى للجميع بس ياريت تقروا كلامى وبعدها فكروا فيه وبعد كده كل واحد يقرر هو حيعمل ايه
خلونى اعرض عرض سريع كده ليه الثوره قامت
الثوره يا جماعه لما قامت فهى قامت عشان تقضى على نظام فاسد
النظام ده مكون من خمس أضلاع أساسيه وهى كالتالي
الضلع الأول هو (حسنى مبارك ومجموعة الفاسدين)
الضلع التاني هو (الحزب الوطني وشلة الفساد والمنتفعين من وراه من رجال الاعمال)
الضلع التالت هو (أمن الدوله)
الضلع الرابع هو (الجزء الفاسد من وزارة الداخليه )
الضلع الخامس هو (الإعلام الفاسد)
قامت الثوره العظيمه عشان تنهى على النظام الفاسد كله وبعد 18 يوم قضت على الضلع الأول بس اللى مع مرور الوقت كل يوم بنكتشف حاجه جديده عنه وعن انه لسه موجود ولسه رئيس للحزب الوطنى ولسه قاعد فى شرم الشيخ ولسه بتوصله تقارير وكلام من هذا القبيل اللى كلنا بنسمعه بغض النظر بقى هو صح ولا غلط لكن اللى اتعملناه فى عصر هذا النظام اللعين ان كل حاجه ممكن تحصل حتى لو مستحيله
المهم احنا قضينا على الضلع الأول وفرحنا جدا وقلنا خلاص الدنيا حتبقى زى الفل ونهدى بقى وبدأ كل واحد يحلم بمصر ولمصر وبدأنا ننضف ونصلح وكلنا أمل نشوف مصر أحسن بلد فى الدنيا وفى وسط الاحداث دى نسينا ان فيه أربع أضلاع لسه موجوده وبتلعب بقوة ... اى نعم هى كانت خامله وقت الثوره وبعد الثوره لكن اما الدنيا بدأت تهدى هى بدأت تنشط وبقوة
خلونا نستعرضهم مع بعض وواحده واحده

الضلع التاني اللى هو الحزب الوطني
مجموعه منه اتجهت لعمل حزب جديد باسم 25 يناير عشان يلحقوا حاجه من الهوجه ويبقوا فى الصوره وباقى الحزب بدأ يجمع نفسه طول الفتره اللى فاتت عشان فى الاّخر يخرج محمد رجب أمين عام الحزب ويعلن ان الحزب حينزل الانتخابات البرلمانيه اللى جايه وما ادراكم بقى ممكن يحصل ايه تانى لو نزل هذا الحزب ببلطجيته وبفساده وبكل الضغينه اللى حصلت جواه بسبب الثوره ساعتها توقعوا أنهار من الدماء المصريه

الضلع التالت اللى هو أمن الدوله
بعد حرق مقراته فى كل محافظات مصر بقى ليه جزء فى مديريات الأمن بيمارس منه نشاطه بكل قوة وبالفعل حاجات كتير بدأت تظهر منهم زى منع د / القرضاوي من الظهور على تلفزيون مصر وزى منع حازم فاروق عضو الاخوان من السفر لبيروت عشان يحضر مؤتمر عن الثوره وزى التضييق اللى بدأو يرجعوا يعملوه على ناس كتيره جدا وزى الاعتقالات والمعتقلين اللى مازال بيمارس ضدهم حتى هذه اللحظه ابشع انواع العذاب وزى الفتن اللى عمالين يعملوها فى الصعيد من ذبح لقسيس ومن حرق لبيت بهائى
يبقى ده معناه ان أمن الدوله أفسد جهاز فى مصر كلها رجع تانى بقوة شديدة وما أدراكم بقى لو رجع زى الاول والله لتعيش مصر اسوأ ايام حياتها لإن الرجوع حيبقى رجوع انتقام

الضلع الرابع اللى هو وزارة الداخليه
بعد كل اللى حصل من افراد فاسده منهم وبعد الهلع والفزع اللى عاشت فيه مصر بسبب فساد بعضهم وانسحابهم وبعد كم الشهداء اللى وقعوا فى المظاهرات وبعد كل البلاوى اللى بتتكشف كل يوم
ومع ذلك كنا كلنا بنادى باعادة بناء الثقه بين الشعب وبين الشرطه عشان يجى فى يوم واحد
ظابط شرطه فاسد لا يعرف معنى المسئوليه يضرب سواق بالنار ويعمل قلق فظيع فى المعادى بعد الدنيا ما كانت هاديه
ويجى شخص غير محترم و مش هقول انسان زى مدير أمن البحيره يخرج يقول للعساكر بتوعه انتم الأسياد واللى ما يسمعش كلام سيده ينضرب بالجزمه (شكرا جدا يا محترم ) احنا بإذن الله قادرين نعرفك مين هو السيد ومين هو العبد
ويخرج وزير الداخليه المبجل اللى هو جزء من نظام قديم فاسد عشان يقولك ان الشهداء اللى ماتوا دول بسبب قله مندسه بين المتظاهرين واكن كل الشعب اللى شاف الرصاص والقنابل واللى انضرب بيها المفروض يبقى غبى ويقول اه فعلا
اومال لو ما كناش انضربنا بيه كنت حتقول ايه
ادى الداخليه يا جماعه العضو الرابع فى منظومة الفساد

الضلع الخامس والاخير وهو الاعلام
الاعلام ده بقى ليه قصه كبيره وبيلعب لعبه قذره جدا
الاعلام عباره عن جزئين تلفزيون وصحافة
التفلزيون اول ما لقى الريس خلاص بخ باعه فى لحظه وبدأ يرجع على طول فى صف الشعب اللى فضل يكدب عليه 18 يوم بحالهم ده غير كدبه عليه لمدة 30 سنه
المهم بدأ تلفزيون الحكومه يلمع الثوره ويجيب شباب الثوره ويجيب ناس ما كناش نحلم انهم يظهروا عليه طبعا كلنا بدأنا نحلم باكتر واكتر ونقول خلاص مصر رجعت لكن فى نفس اللحظه بدأ نفس التلفزيون يعمل حاجه غريبه
يحاول يلمع فى الشرطه وظباط الشرطه
يجيب محمود وجدى وزير الداخليه فى خطاب مستفز للشعب كله
يمنع ناس من الظهور على شاشته
واخيرا نسى خالص يقول ان كان فيه ناس فى التحرير بيتظاهروا وقال ايه كان بيسلى الشعب بكارتون توم وجيرى
على فكره هو نفس التلفزيون اللى الجمعه اللى فاتت كان فى التحرير وكأن التلفزيون ده بيدار بريموت كنترول اعمل يعمل وما تعملش يبقى خلاص ما يعملش
الصحافه دى بقى قصه تانيه خالص
فاكرين يا جماعه ممتاز القط واسامه سرايا وابو حديد دول بتوع الصحف القوميه كانوا بيقولوا على الثوره ايه طول 18 يوم (عملاء وخونه وقله وحراميه وفاسدين ومخربين وووو) وفجأه وبقدرة قادر بقينا رجال و أبطال وشباب الثوره اللى رجع لمصر مجدها
يا شعب مصر ده احنا اتعلمنا ان اللى يشتم غيرك قدامك بكره حيجى يشتمك من ورا ضهرك قدام صاحبك
مابالكم بقى باللى شتمك فى وشك وفجأه ضحك فى وشك
الصحافه برضو بتلعب لعبه قذره مفادها عناوين رنانه وكلمات مثيره وخلى الشعب يحس اننا معاهم بقى واننا ضد الفساد والله يا جدعان ديل الكلب عمره ما حيتعدل
الشعب طبعا يقرا الكلام ده فيهبط اوى يقولك نجحت الثوره وفى نفس اللحظه اضلاع الفساد واضلاع النظام الفاسد شغاله على اشدها فى اجهاض الثوره ومحاولة القيام من جديد

طولت معلش بس الكلام ده مهم جدا جدا الكل يبقى فاهمه اختم معلش بكام نقطه مهمين
1--شفيق لازم يمشى فورا وحالا بغض النظر بقى انه كده كده ماشى والكلام اللى الكل بيرددو ده
من الاخر يا جماعه شفيق ده اكتر بيئه خصبه واكتر تربه مناسبه عشان اضلاع الفساد يرجعوا تانى كما كانوا وبالتالى ال6 شهور دول هما مسألة حياة او موت بالنسبه ليهم لازم يستغلوا وجوده وبقوه عشان يحميهم هو لحد ما كل اركان الفساد واضلاعه يكتمل قيامها
وبعدها بقى ما تستبعدش خالص انه يفضل مستمر فى الوزاره او حتى يبقى رئيس ما خلاص بقى
وطبعا فى سبيل ان ده يحصل هما بيعلمونا وبيخلونا نردد كلمات وجمل رائعه منها
هو كده كده ماشى خلوه يخلص مدته ويروح لحال سبيله
نديله فرصه ونشوفه ده راجل محترم وابن ناس وبيتكلم باحترام واكن المفترض ان اللى يكلمنا يبقى بيتكلم بقلة ادب عشان اقوله امشى يا جماعه الاصل هو الاحترام مش قلة الادب بس عشان احنا غلابه الدنيا بقت معكوسه معانا

2- نقطه تانيه مهمه جدا جدا
كل الناس بدات تقولك يلا نبني بلدنا ويلا ننضف بلدنا ويلا نعمل ويلا نخلى وكفايه مظاهرات وكفايه اعتصامات واهو التحرير موجود
يا جماعه حاقولكم حاجه بسيطه انت لو عندك عماره 10 ادوار عاوز تبنيها فانت لازم تعملها اساس متين جدا عشان تستحمل ال10 ادوار
الاساس فى حالتنا هنا هو الثوره والمطالب بتاعتها اللى لسه ما خلصتش ولا اتحققت
النضافه بقى والبناء والتعمير وخلافه فدي هى العماره الكبيره اللى لو فضلنا نبني فيها ونكبر العماره ونسينا الاساس والله هييجي يوم وتقع فوق راسنا كلنا ومش حيقوم لها قومه
ركزوا بالله عليكم على الاساس كويس اوى اولا ومفيش مانع اننا نفكر فى ال10 ادوار وفى العماره الجميله بس ما ننساش ان لسه الثوره ما خلصتش

3- لو عندك كرتونه تفاح وفيها 5 تفاحات بايظين وانت شلت منهم أربعه وسايب واحده بس فانت لازم تكون متأكد انها حتبوظ الكرتونه كلها
ما بالك بقى اما تبقى انت شايل تفاحه واحده بايظه وسايب الباقى كله في الكرتونه
يا جماعه احنا من النظام الفاسد كله شلنا مبارك لكن كل الفساد الباقى لسه موجود وبيبرتع فى كل مكان وبحريه

اختم واقول بالله عليكم اوعوا تخلوا التاريخ يوصمنا بالعار ويقول ده الجيل اللى عمل نص ثوره وفضل يحتفل بيها لحد ما ضيعها وضيع مصر معاها
خلوا التاريخ يذكرنا بالخير لإن التاريخ مش بيرحم
تحيــــــــــا مصر

* من فضلك انشرها *
عشان غيرك يقراها
جزاكم الله خيرا

دعاء حماد - شباب ثورة 25 يناير - إسكندرية

» جدارية ثورة - فتح العاصفة
» عز الدين القسام رجل قاد ثورة
» بيانات * ثورة اللاجئين الفلسطينيين *
» ثورة الشك ... عبدالله الفيصل
» ثورة الستة وثلاثين 1936 ـ 1939